"Jou yo te retire bos bizòn mwen an grasa yon senp liposuksyon, sa te chanje lavi m. Mwen te santi yon soulajman imedyat. Se te tankou mwen te nòmal ankò."

Michael Achille, yon rezidan South Orleans, Massachusetts, te kòmanse devlope lipodistrofi grav an 2001-2002 akoz medikaman VIH li a.

Lipodistrofi Michael la te manifeste kòm yon bos bizòn, yon kousen grès nan dèyè kou l ki te grandi epi ki te byen vit vin febli l. Akimilasyon grès anòmal la te fè tèt li panche pi devan e li te ba li anpil doulè, tankou tèt fè mal ak gwo doulè nan do. Bous bizòn nan te fè dòmi ak kondwi trè difisil, paske li pa t ka kouche sou do l ni vire tèt li fasilman. Malgre ke medikaman pou doulè tankou Vicodin te ede soulaje kèk nan sentòm yo, sa pa t solisyon alontèm li t ap espere a.

Finalman, doktè Michael la te di l te gen yon pwosedi senp ki t ap ba li soulajman: liposuksyon pou retire bos bizò a. Malerezman, MassHealth te refize demann chirijyen li a pou otorizasyon alavans. Chirijyen li a te ankouraje Michael pou l fè apèl, epi li te fè sa, li te rasanble dokiman nan men tout founisè medikal li yo pou pwouve nesesite medikal tretman an.

Michael te ale nan odyans apèl la nan Taunton, epi li pa t ka kwè repons lan: doktè MassHealth la te deklare ke doulè ak feblès Michael yo pa t enpòtan. Ofisye odyans lan te menm fè Konklizyon de Reyalite ke "lipodistrofi li a lakòz pwoblèm dòmi, tèt fè mal ak doulè nan do ki febli l, ansanm ak detrès sikolojik."“

Malgre sa, desizyon Apèl la kontinye pou l deklare, “Reprezantan MassHealth la te note ke se pa yon kesyon de si moun k ap fè apèl la bezwen pwosedi sa a oswa si li ka benefisye de li, men pito youn nan sèvis yo mande yo pa yon sèvis Massachusetts kouvri.” Kòm rezilta, ofisye odyans lan te refize apèl Michael la san menm konsidere si operasyon an te nesesè medikalman. Men l yo te mare.

“Mwen te tèlman boulvèse e mwen pa t konn sa pou m fè,” Michael di. Erezman, li te kapab jwenn yon avoka pou reprezante l gratis. Avoka a te depoze yon Demann pou Nouvo Odyans dirèkteman bay Direktè Medicaid la, Dr. Julian Harris, pou l prezante agiman pou nesesite medikal la ansanm ak agiman legal an favè tretman an. Michael te soulaje lè l te aprann ke Dr. Harris te detèmine ke Michael ta dwe sibi yon operasyon liposuksyon.

“Jou yo te retire bos bizòn mwen an grasa yon senp liposuksyon te chanje lavi m,” Michael eksplike. “Mwen te santi yon soulajman imedyat. Mwen te kontan anpil. Se te tankou mwen te nòmal ankò.”

Michael ap pataje istwa li paske li konnen li pa posib pou tout moun ki bezwen tretman sa a fè yon apèl epi jwenn yon avoka pou pote ka yo dirèkteman bay Direktè Medicaid la pou yo konsidere li. Anfèt, anpil moun pa chèche tretman, paske yo tande li pa kouvri e poutèt sa yo pa konn sa pou yo fè.

Michael te gen chans, men tretman ki nesesè medikalman pa ta dwe kite chans pou li.